PRUSA

PRUSA

quae PRUSIAS Solino, c. 44. Bursa Bellonio, Burusse Turcis, teste Leunclaviô, urbs Bithyniae hôc tempore primaria, apud montis Olympi radices, a Nicaea 25. mill. pass. in Occasum distans. Cotyaeum versus 60. ex qua pars Bithyniae Bursia nominatur, Episcopalis, olim sub Archiepiscopo Nicomediensi, sed postea metropolisfacta. A Prusia Rege A. M. 3279. condita; amplissima ante Turcarum in Europam adventum regia, ab Othomanno eorum rege capta, A. C. 1327. post diuturnam obsidionem, incolisque dimissis regni ibi sedes posita est, Leuncl. Hist. Turc. Nicephor. l. 7. 8. 9. 10. Hîc Asclepiades Medicus claruit, qui senex lapsus scalis interiit, cum multos sanitati restituisset, Plin. l. 7. c. 37. Hîc etiam Dion Prusaeus, qui scripsit libros 10. de Virtute Alexandri M. etc. Prusa altera, Prusias Ptolemaeo, Ctos Stephano, urbs Bithyniae maritima Episcopalis in orâ, inter ostia Ascanii fluv. et Dascyleum urbem, a quâ parum abest. Prusiae magna cerasorum copia provenit, ut propterea Cherasia vulgo, et Cheris, teste Thevetô, dicta fuerit. Prusa tertia, urbs Bithyniae mediterranea ad Hippium mont. et fluv. Prusias Straboni, Episcopalis sub Archiepiscopo Claudiopolitano, quam Hylas fluv. et lacus alluunt. Barech hodie, ex tabul. recent. a priore Prusa supra 50. mill. pass. in Boream distans. Hinc Prusiacus. Silius, l. 13. v. 888.

Donec Prusiacas delatus segniter oras.

Baudrand. Prusa ad Hippium, urbs Bithyniae, 10. tantum milliar. ab ostio Hippii fluv. et ab ora Ponti Euxini et Mariandini sinus, 70. a priori Prusa in Boream, uti 60. a Nicea. Primae descriptionem eius, qualis hodie est, accuratam exhibet Cl. Sponius Itinerar. VII. Eccl. p. 276. et seqq. ubi inter alia, situm eius adeo sublimem, ut inde Constantinopolim prospici possit, solumque fertilissimum, esse; praeterea Turcarum circiter quadraginta, Iudaeorum 12. milia, urbem incolere, Armeniorumque et Graecorum etiam quosdam in suburbiis habitare, refert. Vide hîc infra.